Թրամփի «մարդաորսը» շարունակվում է․ հիմա էլ՝ 94-ամյա Կաստրոն

Fri, 29 May 2026 13:30:36 +0400

Վենեսուելայի առաջնորդ Նիկոլաս Մադուրոյին առևանգելուց և դատելուց հետո, Թրամփի վարչակազմը հիմա էլ համաշխարհային այլ գործչի վրա է սևեռվել։

ԱՄՆ գլխավոր դատախազի պաշտոնակատար Թոդ Բլանշը հայտարարել է իր պատրաստակամության մասին՝ անել ամեն ինչ, որպեսզի Կուբայի հեղափոխության առաջնորդներից մեկը՝ բանակի գեներալ Ռաուլ Կաստրոն, դատվի ԱՄՆ-ում։ Այս մասին ասել է Fox News-ին տված հարցազրույցում։

«Մեզ պետք է, որ Կաստրոն այստեղ՝ ԱՄՆ-ում լինի և կանգնի դատարանի առջև։ Մենք կանենք ամեն ինչ, որպեսզի նրան այստեղ բերենք», – ասել է նա։

Բլանշը հիշել է Վենեսուելայի նախագահ Նիկոլաս Մադուրոյի առևանգումը ԱՄՆ ուժերի կողմից՝ այն անվանելով «ծայրահեղ օրինակ»։ «Մենք սովորաբար դա անում ենք արտահանձնման և միջազգային գործընկերների հետ համագործակցության միջոցով», – ասել է պաշտոնյան։

ԱՄՆ Արդարադատության նախարարությունը նախկինում Կաստրոյին մեղադրել է չորս մարդու սպանության, երկու ինքնաթիռի ոչնչացման և ԱՄՆ քաղաքացիների սպանության հետ կապված դավադրության մեջ։ Մեղադրանքները բխում են 1996 թվականի միջադեպից, որի ժամանակ Կուբայի ռազմաօդային ուժերը խոցեցին Մայամիում գործող «Փրկության եղբայրներ» աքսորյալ կազմակերպությանը պատկանող երկու ինքնաթիռ: Այս գործում մեղադրյալներ են նաև հինգ այլ անձինք:

Բլանշի խոսքով՝ ԱՄՆ Արդարադատության նախարարությունը ակնկալում է, որ 94-ամյա Կաստրոն դատարան կներկայանա «կամավոր կամ այլ» սկզբունքով: