Խաղային ոլորտի կարգավորման վերահսկողությունը ով է իրականացնելու

Thu, 06 Aug 2026 12:02:40 +0400

Հայաստանի խաղային ոլորտի կարգավորման գործառույթը կիրականացնի Մալթայում գրանցված Random Systems International Limited ընկերությունը։ Կազմակերպությունը գործունեություն է իրականացնում նաև Վրաստանում։

Համապատասխան որոշումն ընդունվել է Կառավարության օգոստոսի 6-ի նիստում։

Նախագիծը ներկայացրել է Պետական եկամուտների կոմիտեի նախագահի ժամանակավոր պաշտոնակատար Էդուարդ Հակոբյանը։ Նրա խոսքով՝ դեռևս 2024 թվականին «Խաղային գործունեության կարգավորման մասին» օրենքով նախատեսվել էին մի շարք փոփոխություններ, այդ թվում՝ պետություն-մասնավոր համագործակցության շրջանակում վերահսկողության նոր մեխանիզմների ներդրում։

Հակոբյանի ներկայացմամբ՝ օրենքի ընդունումից հետո կազմակերպվել է համապատասխան մրցույթ, որին մասնակցելու հայտ են ներկայացրել երեք արտասահմանյան ընկերություններ։

Մրցույթի արդյունքներով հաղթող է ճանաչվել Random Systems International Limited ընկերությունը, որն ունի ոլորտում անհրաժեշտ փորձ և նմանատիպ գործունեություն է իրականացնում նաև հարևան Վրաստանում՝ որպես խաղային ոլորտի կարգավորման օպերատոր։

ՊԵԿ ղեկավարի ժամանակավոր պաշտոնակատարը նշել է, որ ընկերության հետ համագործակցության նպատակն է ներդնել ժամանակակից թվային համակարգեր և ստեղծել արդյունավետ վերահսկողական գործիքներ։

Նրա խոսքով՝ մրցույթի հաղթող կազմակերպությունը պարտավորվել է Կառավարության որոշումն ուժի մեջ մտնելուց հետո վեց ամսվա ընթացքում ամբողջությամբ ներդնել խաղային ոլորտի էլեկտրոնային կառավարման համակարգը։