«Հրապարակ». Միջամտությունները հասցրել են նրան, որ, օրինակ, ՀՅԴ-ն չի առաջադրվել

Thu, 22 Oct 2026 08:45:03 +0400

«Հրապարակի» զրուցակիցն «Իրազեկ քաղաքացիների միավորում» ՀԿ նախագահ Դանիել Իոաննիսյանն է:

– Աշնանային ՏԻՄ ընտրությունները, որոնց միջոցով համայնքային իշխանություններ են ձեւավորվելու 40-ից ավելի համայնքներում, շատ տխուր պատկեր են գծագրում, որին Դուք էլ եք անդրադառնում` իշխանությունների կողմից իրականացվող ապօրինություններին էլ եք գնահատականներ տալիս: Օրերս գրել էիք, որ Արմավիրի մարզպետն ընդդիմության շրջանում սպառնացել է, որ ընդդիմադիր ուժերից մեկի ներկայացուցչի որդին բանակում խնդիրներ կունենա` ճնշում գործադրելով, որպեսզի իր թեկնածությունը հանի, ինչից հետո մարզպետը հայտարարել էր, որ Ձեր դեմ դատական հայց է ներկայացնելու, քանի որ իրեն զրպարտել եք: Հոկտեմբերի 21-ին տեղեկացանք, որ Ստեփանավանում ձերբակալվել են «Ուժեղ Հայաստան» կուսակցության համայնքապետի թեկնածուն եւ 13 անձ: Ձեր տպավորությամբ՝ ի՞նչ է կատարվում այժմ երկրում, ինչո՞ւ են իշխանությունները որոշել այս ձեւով պայքարել քաղաքական հակառակորդների դեմ: Նիկոլ Փաշինյանը զոհի դերում է ներկայանում, իր գրառումներով փորձում է ներկայացնել, թե իբր ապօրինությունների դեմ է պայքարում, բայց քայլերը հակառակի մասին են փաստում:

– Արմավիրի մարզպետը կարող է հանգիստ ինձ դատի տալ, դա իր պրոբլեմն է, ինչ ուզում է` կարող է անել, կարող է վիճարկել, որ երկինքը կապույտ է, հետո ի՞նչ: Դա իր իրավունքն է: Ինչ վերաբերում է նրան, որ իշխանությունը զոհի կերպարի մեջ է մտել, ապա ես ավելի կոնկրետ այս պրոցեսը ոչ թե իշխանության եւ ընդդիմության միջեւ կբաժանեի, այլ կբաժանեի բարեխիղճ եւ անբարեխիղճ խաղացողների միջեւ: Նմանները կան երկու կողմում էլ, կան թե՛ բարեխիղճներ, թե՛ անբարեխիղճներ: Այսինքն` երկուսում էլ կան մարդիկ, ովքեր կողմ են օրինականությանը, եւ հակառակը` կան մարդիկ, ովքեր կողմ են ապօրինություններին: Ինչ վերաբերում է Ստեփանավանում տեղի ունեցածին, ապա գործ ունենք առերեւույթ ընտրակաշառքի հետ, տեսագրություն էլ կա:

– Բայց չկա դատարանի վճիռ, չկա կոնկրետ ապացույց, որ անձը կաշառք է բաժանում, փող հաշվելը, ամեն դեպքում, ընտրակաշառք չէ:

– Եթե կանխիկով փող են տալիս, դա արդեն իսկ խոսում է…. կանխիկով փող էս դարում ո՞վ է ում տալիս: Ինչ վերաբերում է դատավճռին, ապա դրա համար էլ ես ասացի` առերեւույթ ընտրակաշառք: Դա առերեւույթ ընտրակաշառք է: Կլինի դատավճիռ, ամեն բան հստակ կլինի, կա՛մ «առերեւույթ» բառը կհանվի, եւ կապացուցվի, որ ընտրակաշառք է, կա՛մ հակառակը` դատավճիռ կկայացվի, որ ընտրակաշառք չի բաժանվել:

– Ընդդիմադիրների ցուցակներից աննախադեպ թվով թեկնածուներ են ինքնաբացարկ հայտնում, նրանցից մի քանիսին աշխատանքից են ազատել` ընդդիմության շարքերը համալրելու համար: Ի՞նչ պրոցես է սա:

– Ինքնաբացարկների մի մասը նորմալ է, մի մասը` ոչ: Օրինակ` «Հայրենիք» կուսակցության մասով նրանք ինքնաբացարկ են հայտնել, որովհետեւ ցանկանում են, որ ընդդիմության ձայները չկիսվեն: Մեր դիտորդները տեղում փորձել են ուսումնասիրել` եղե՞լ են ճնշումներ, սակայն Ստեփանավանից ասել են, որ ճնշումներ չկան, բայց դա չի նշանակում, որ ամենուր այդ պատկերն է: Օրինակ` Իջեւանից, Արմավիրից, Գավառից, Արթիկից էլ հակառակն են պնդում: Մեր ունեցած տեղեկությունների համաձայն, ավելի կոնկրետ` ահազանգերի համաձայն, տարբեր միջամտությունները հասցրել են նրան, որ, օրինակ, Դաշնակցությունը չի առաջադրվել ընտրություններում:

– Մի կարեւոր հանգամանքի վրա եւս ուզում եմ ուշադրություն դարձնենք` ընդդիմության թեկնածուները գնում են անձնագրայիններ` առաջադրման համար տեղեկանք վերցնելու, սակայն անձնագրայինից դուրս գալուց հետո, դեռ տուն չհասած, անձնագրայինների տնօրեններն իշխանություններին հայտնում են, թե ով է թեկնածություն առաջադրել, որտեղ է աշխատում եւ այլն, եւ մարդիկ սպառնալիքներ են ստանում անմիջապես:

– Փոքր երկիր է, փոքր երկրներում այնքան ձեւեր կան՝ դրանք ճշտելու: Ես՝ ինքս, անձնագրայինների հետ կապ չունեմ, սակայն փոքր երկրներում համայնքի ղեկավարը կարող է զանգել անձնագրային եւ ճշտումներ կատարել, կամ ինչ-որ մեկը կարող է զանգել անձնագրայինում աշխատող իր ծանոթին եւ հարցնել, թե ով է եկել տեղեկանք վերցնելու:

– Այսինքն` կարող ենք ֆիքսել, որ մեր երկրում մարդու անձնական տվյալների գաղտնիությունը եւս չի գործում ընդհանրապես:

– Ես չեմ ասում, թե դա նորմալ է: Ուղղակի չեմ բացառում, որ նման դեպքեր եղել են: Հայաստանում, այո, անձնական տվյալների պաշտպանությունը, մեղմ ասած, լավ վիճակում չէ: Բայց, ամեն դեպքում, եթե անձն առաջադրվում է, դա հո գաղտնի չէ՞ր մնալու:

– Գաղտնի չէր մնալու, սակայն այդ մասին տեղեկությունը տարածվելու էր օրենքի սահմաններում:

– Հասկանալի է, ես չեմ արդարացնում, ուղղակի դա ամենածանր հանցագործությունը չէ: Այստեղ խնդիրն այն է, որ մարդկանց վրա ճնշումներ են գործադրում, որպեսզի մարդիկ հրաժարվեն առաջադրվելուց, սա է ամբողջ խնդիրը: «Անկախ դիտորդ» դաշինքը, որի շրջանակներում ես նույնպես դիտորդ եմ լինելու կիրակի օրը, այս բոլոր հարցերով զբաղվում է: