Տղամարդը յոթ օրվա կալանքի է ենթարկվել ինքնաթիռում անկարգություն առաջացնելու համար

Sat, 07 Nov 2026 21:30:32 +0400

Ռուսաստանի քաղաքացին, որը Կուալա Լումպուր-Տաշքենդ չվերթի ժամանակ հարբած վիճակում անկարգություն էր առաջացրել և վայրէջքից հետո հրաժարվել էր ենթարկվել ոստիկանության հրամաններին, դատապարտվել է յոթօրյա վարչական կալանքի, ՌԻԱ Նովոստիին հայտնել են Ուզբեկստանի Ներքին գործերի նախարարության տրանսպորտի և զբոսաշրջության օբյեկտների անվտանգության դեպարտամենտից։

Դեպարտամենտի տվյալներով՝ Ռուսաստանի քաղաքացին, որը Կուալա Լումպուրից Տաշքենդ թռչում էր Uzbekistan Airways-ի չվերթով, եղել է հարբած վիճակում և ինքնաթիռում ագրեսիվ է վարվել՝ անպարկեշտ արտահայտություններ օգտագործելով բորտուղեկցորդների և ուղևորների նկատմամբ։

Նա չի արձագանքել անկարգությունը դադարեցնելու նախազգուշացումներին կամ պահանջներին, իսկ վայրէջքից հետո ագրեսիվ է եղել նաև ոստիկանների նկատմամբ։

«Դատարանի որոշմամբ ուղևորը, որը Ռուսաստանի քաղաքացի է, դատապարտվել է յոթօրյա վարչական կալանքի: Նրա դեմ կազմվել է արձանագրություն՝ «մանր խուլիգանություն» և «ներքին գործերի աշխատակցի օրինական պահանջները չկատարելու» հոդվածներով վարչական իրավախախտումների համար», – հայտնել է գերատեսչության մամուլի խոսնակը: