Ինչ է ակնկալում ԲՀԿ-ն Սահմանադրական դատարանից

Fri, 19 Jun 2026 17:20:22 +0400

«Բարգավաճ Հայաստան» կուսակցությունը Ազգային ժողովի ընտրությունների արդյունքները վիճարկող դիմում է ներկայացրել Սահմանադրական դատարան։

ՍԴ-ի դիմաց լրագրողների հետ զրույցում փաստաբան Արամ Օրբելյանը նշել է, որ իրենց հիմնական ակնկալիքը վերաքվեարկության անցկացումն է՝ օրենքով սահմանված բոլոր ընթացակարգերի և կանոնների պահպանմամբ։

Նրա խոսքով՝ հաշվի առնելով, որ կուսակցությունը, իրենց հաշվարկներով, ստացել է անհրաժեշտ 4 տոկոսը, որպես այլընտրանք ներկայացվում է նաև մանդատների բաշխման այլ տարբերակ, որը թույլ կտա կուսակցությանը մտնել խորհրդարան։

Օրբելյանը նաև ընդգծել է, որ այլ տարբերակ, իրենց գնահատմամբ, չկա։ Նա նշել է, որ եթե ԿԸՀ-ն ուներ մի քանի հնարավոր լուծումներ, այդ թվում՝ տեղամասերում վերաքվեարկություն կազմակերպելու, ապա Սահմանադրական դատարանի դեպքում այդպիսի լայն հնարավորություններ չկան․ դատարանը կամ պետք է ընտրությունները անվավեր ճանաչի և նշանակի ամբողջական վերաքվեարկություն, կամ սահմանի մանդատների բաշխման այլ կարգ։