Իշխանության գալու դեպքում դա անպայման անելու ենք

Fri, 08 May 2026 20:11:49 +0400

Էջմիածնում անցկացված հանրահավաքով մեկնարկել է «Հայաստան» դաշինքի նախընտրական քարոզարշավը։ Միջոցառման ընթացքում ելույթ է ունեցել դաշինքի պատգամավորի թեկնածու Աննա Գրիգորյանը՝ անդրադառնալով վերջին ութ տարիների քաղաքական զարգացումներին և գործող իշխանությունների գործունեությանը։

Նրա խոսքով՝ ներկայիս իշխանությունները տարիներ առաջ իշխանության էին եկել սիրո և համերաշխության խոստումներով, սակայն ժամանակի ընթացքում, ըստ նրա, հասարակությունը բախվել է պառակտման, ներքին թշնամանքի և հիասթափության։

Գրիգորյանը քննադատել է իշխանությունների դիրքորոշումների փոփոխությունը Արցախի հարցում՝ հիշեցնելով նախկինում հնչեցված հայտարարություններն ու ներկայիս մոտեցումները։ Նա անդրադարձել է նաև Շուշիի թեմային, ինչպես նաև Արցախի նախկին ղեկավարների նկատմամբ վերաբերմունքին՝ նշելով, որ այսօր իշխանությունները լռում են, երբ Ադրբեջանը նրանց ներկայացնում է որպես «ռազմական հանցագործներ»։

Դաշինքի ներկայացուցիչը խոսել է նաև Հայ Առաքելական եկեղեցու շուրջ ստեղծված իրավիճակի մասին՝ պնդելով, որ իշխանությունները հակասության մեջ են մտել եկեղեցու հետ և նույնիսկ քննարկում են կաթողիկոսի հեռացման հարցը։ Նրա խոսքով՝ նման քայլերը անընդունելի են։

Աննա Գրիգորյանը հայտարարել է, որ «Հայաստան» դաշինքը իշխանության գալու դեպքում նպատակ ունի վերացնել հասարակության ներսում առկա բաժանումները, ապահովել երկրի անվտանգությունը և վերադարձնել Բաքվում պահվող հայ գերիներին։ Նա նաև նշել է, որ իրենց քաղաքական ուժը ձգտելու է փակել պատերազմների, պարտությունների և նվաստացման էջը՝ փոխելով ներկայիս իշխանությանը։