Ձեր «պետական արժանապատվությունը» սրանից չի վիրավորվու՞մ

Sun, 01 Nov 2026 15:43:59 +0400

Արդեն հայտնի է, որ հայկական բանակում կրկին հայ զինծառայողի մահվան դեպք է արձանագրվել։
Երիտասարդ Տիգրան Ստեփանյանի մարմինը հայտնաբերվել է հրազենային վնասվածքով։
Խորին ցավակցություններս Տիգրանի հարազատներին ու մտերիմներին։

Պետության լիակատար դեգրադացիայի առաջնային ցուցիչներից մեկն այն է, երբ օրվա իշխանությունների այդքան զգայուն` «պետական արժանապատվությունը» բացարձակապես չի վիրավորվում այն ժամանակ, երբ սեփական պետության տարածքներն օկուպացված են, երբ հարևան պետության ղեկավարներն ամենօրյա ռեժիմով ստորացնում ու նսեմացնում են հայ ժողովրդին, երբ թշնամին պարտադրում է փոխել երկրի Սահմանադրությունը, երբ բանտերը լցված են ընդդիմադիրներով, կամ երբ բանակում սարսափելի պարբերականությամբ զինվորներ են զոհվում։
Իշխանությունների «պետական արժանապատվությունը» խիստ վիրավորվում է միայն այն ժամանակ, երբ այդ խնդիրները բարձրաձայնվում և դրվում են նրանց առջև։

Խեղաթյուրված և բարոյապես ապականված համակարգում իշխանամետ հատվածի պատկերացումները «պետական արժանապատվության» մասին այնքան են այլասերվել, որ այդ հասկացության բուն իմաստն ու արժեքը լիովին շրջվել է գլխիվայր։

Արման Աբովյան